ମୁମ୍ବାଇ,୨୩/୦୧: ହସ୍ପିଟାଲରେ ଭର୍ତ୍ତି ଫିଲ୍ମ 'ଡଙ୍କି'ରେ ଶାହରୁଖଙ୍କ ସହ କାମ କରିଥିବା ବରୁଣ କୁଲକର୍ଣ୍ଣି । ସେ ବର୍ତ୍ତମାନ ହସ୍ପିଟାଲରେ ଜୀବନ ମୃତ୍ୟୁ ମଧ୍ୟରେ ଲଢ଼ୁଛନ୍ତି । ଅଭିନେତା ଜଣକ କିଡନୀ ସମ୍ବନ୍ଧୀୟ ରୋଗରେ ପୀଡିତ ଥିବା ବେଳେ ବର୍ତ୍ତମାନ ମୁମ୍ୱାଇର ଏକ ହସ୍ପିଟାଲରେ ଚିକିତ୍ସାଧୀନ ରହିଛନ୍ତି । ଏପରି ପରିସ୍ଥିତିରେ, ତାଙ୍କ ବନ୍ଧୁ ରୋଶନ ସେଟ୍ଟୀ ତାଙ୍କ ଚିକିତ୍ସା ପାଇଁ ଆର୍ଥିକ ସହାୟତା ପାଇଁ ସୋସିଆଲ ମିଡିଆରେ ଲୋକଙ୍କୁ ନିବେଦନ କରିଥିବା ଦେଖିବାକୁ ମିଳିଛି।
ସୂଚନା ମୁତାବକ, ରୋଶନ ସେଟ୍ଟୀ ଇନଷ୍ଟାଗ୍ରାମରେ ହସ୍ପିଟାଲରୁ ବରୁଣଙ୍କ କିଛି ଫଟୋ ସେୟାର କରିଛନ୍ତି । ଯେଉଁଥିରେ ବରୁଣଙ୍କୁ ହସ୍ପିଟାଲ ବେଡ଼ରେ ଶୋଇଥିବାର ଦେଖିବାକୁ ମିଳିଛି । ଏହା ସହିତ ରୋଶନ କ୍ୟାପସନରେ ଲେଖିଛନ୍ତି 'ମୋର ପ୍ରିୟ ବନ୍ଧୁ ଏବଂ ଥିଏଟର ସହ-ଅଭିନେତା ବରୁଣ କୁଲକର୍ଣ୍ଣି ବର୍ତ୍ତମାନ ଏକ ଗମ୍ଭୀର କିଡନୀ ସମସ୍ୟାରେ ପୀଡିତ । ଆମର ପ୍ରୟାସ ସତ୍ତ୍ୱେ, ତାଙ୍କ ଚିକିତ୍ସାର ଖର୍ଚ୍ଚ ବୃଦ୍ଧି ପାଇବାରେ ଲାଗିଛି । ତାଙ୍କୁ ନିୟମିତ ଚିକିତ୍ସା ଏବଂ ଜରୁରୀକାଳୀନ ହସ୍ପିଟାଲ ଗସ୍ତ ଆବଶ୍ୟକ ଏବଂ ସପ୍ତାହରେ ୨-୩ ଥର ଡାଏଲିସିସ୍ ମଧ୍ୟ ଆବଶ୍ୟକ । ଦୁଇ ଦିନ ପୂର୍ବରୁ, ବରୁଣଙ୍କୁ ଏମରଜେନ୍ସି ଡାଏଲିସିସ୍ ସେସନ୍ ପାଇଁ ହସ୍ପିଟାଲକୁ ନିଆଯାଇଥିଲା । ବରୁଣ କେବଳ ଜଣେ ଭଲ ଅଭିନେତା ନୁହଁନ୍ତି ବରଂ ଜଣେ ଦୟାଳୁ ଏବଂ ନିଃସ୍ୱାର୍ଥପର ବ୍ୟକ୍ତି ମଧ୍ୟ । ସେ ବହୁତ କମ୍ ବୟସରେ ତାଙ୍କ ବାପାମାଆଙ୍କୁ ହରାଇଥିଲେ ଏବଂ ସେବେଠାରୁ ସେ ଜଣେ ଆତ୍ମନିର୍ମୀ ବ୍ୟକ୍ତି ହୋଇଯାଇଛନ୍ତି, ସମସ୍ତ ପ୍ରତିକୂଳ ପରିସ୍ଥିତି ସତ୍ତ୍ୱେ ଥିଏଟର ପ୍ରତି ତାଙ୍କର ଆଗ୍ରହକୁ ଅତୁଟ ରଖିଛନ୍ତି ।' ବରୁଣ ଅନେକ ଚଳଚ୍ଚିତ୍ର ଏବଂ ଧାରାବାହିକରେ ସହ ତାରକା ଭୂମିକାରେ ଅଭିନୟ କରିଛନ୍ତି । ସେ 'ଫ୍ୟାମିଲି ମ୍ୟାନ୍ ସିଜନ୍ ୧' 'ସ୍କାମ୍ ୧୯୯୨' ଏବଂ 'ଡଙ୍କି' ରେ କାମ କରିଛନ୍ତି।
